زاهد عزت حرش
 
يا بني.. انتبه
أن ضحكت الأيام ما تغويك
أضحكلها
وخليك صاحي للزمن خليك
وابقى ع نفس الدرب لا تنغر
قد ما الدني من سحرها تعطيك
وان كان الدهر يا بني
جار عليك..
سامحو لدهر ت يخاويك
تعذبت يا بني.. من القهر
حر الجمر.. من حرقتو كاويك
سنين القهر راحت
ومن سنتين
ما عاد الها حق تتجافيك
وساعة صفا نام الدهر
وبغفوتو.. طل القمر يا بني ت يحاكيك
حلوي وأحلى من القمر..
من شرش قلبا الحب عم تعطيك
هي معك يا بني
ع درب العمر
مزروع ورد الحب فيها وفيك
 
 
اعطيتك من الأخلاق
يا بني كروم
من خمر هاك العز عم بسقيك
وفيك زرعت بستان من ريحان
ت بريحتوا عطر الوفى يغطيك
يا بني العمر
شطحة سفر.. وياما البشر
ع الكذب بتمشيك
يا بني انتبه
مش كل من ضحك لك
ضحك ت يهنيك
كاس العمر يا بني
كاس الحب..
من شر بلوى الحب ما يشفيك
قد ما عيونك من الدنيا تشوف
غير العشق يا بني
ما بيرضيك
 
 
وان كان الدهر يابني
حن وصار
ع درب كلا ورد بمشيك
ويسقيك من نبع الصفا
وايام حلوي من زهوتو يعطيك
والناس.. اطيب ناس
من قلبها تفرح الك
تكبر.. وتفرح فيك
بخاطرك يا بني كون كبير
بقلبك.. بروحك..
ولا تغّرك الايام.. ولا تغريك
 
كانون اول 2011